جيل مش فاهم حاجه لـ محمود مجدى

جيل مش فاهم حاجه


لو انت مش من جيلى ..

هتحس انى بهاجمك .. و كمان بحملك المسئوليه

بس عايزك تستحملنى شويه للاخر .. يمكن افهم حاجه منك انا مش فاهمها
زى ما معظم جيلك بيقول على جيلى .. انه جيل مش فاهم حاجه

انا مش بقارن بين جيلك و جيلى

انا يمكن بقيت بسمع الجمله دى من معظم جيلك من بعد شهور من الثوره لحد النهارده
ان احنا جيل مش فاهم حاجه
ان احنا جيل عايز كل حاجه بسرعه
ان احنا جيل بيمشى ورا الهوجه
ولما تجيب اخرك مننا تقول علينا .. جيل تافه

جيلى اللى دايما شايفه انه قليل مهما عمل
جيلى اللى دايما بتحسسه انه جنبك ولا حاجه
جيلى اللى دايما عايز توصله ان جيلك صاحب الإنجازات
جيلى اللى دايما بتمرمطه عشان تعلمه حاجه .. و ياريتك بتعلمهاله كامله

احب افكرك .. انك طلعت بجيلى ده السما لما الثوره اتعملت
احب افكرك .. ان الجمله الوحيده اللى كنت بتقولها
ان جيلى عمل اللى جيلك معرفش يعمله

جيلى اللى عايز يغير كل حاجه حواليه .. عشان تعب منها
جيلى اللى مبقاش فارق معاه الموت .. عشان معظمه عايش و هو اصلا ميت
جيلى اللى كان عايش مجبر على اختيارات جيلك

جيلك اللى ظلم نفسه بسكوته .. و ظلمنا معاه

جيلك اللى كان مفروض يعلمنى .. و قصر فى تعليمى عشان ساكت على حقه
جيلك اللى كان عشان يساعدنى .. ياخد المقابل منى مش من اللى خده منه
جيلك اللى يمكن قلل فرصى من غير مايقصد

حاجات كتير غلط بيعشها جيلى .. بسبب جيلك
مش بقول ان كل جيلك غلط .. لكن الغلط فى السكوت و عدم تغير اللى حواليك

الغلط ان كنت بسمع منك فى اغلب المشاكل
ياعم سيبك .. خلينا فى حالنا .. احنا مالنا

حتى لما كنت بتسامح كنت بتقول
اللى فات .. مات

ونسيت ان جيلنا احنا اللى بيموت
جيلنا الى بيدفع تمن كل حاجه .. حتى لما بقى شهيد

و عشان مش ابنك و عشان مش من بيتك .. مفرقش معاك

عايزك بس تفكر لثوانى
سواء كنت من جيلى او مش من جيلى

عايزك تبص لحد من اهل بيتك و اعتبر شهيد او مصاب من الثوره
و جاوب على سؤال واحد بس

هتحاول تغير كل اللى حواليك و تجيب حقه ؟
ولا هتقول
اللى فات .. مات

عايز اقولك
احنا جيل .. عايز يعيش اللى فاضل من عمره
بكرامه .. و عدل .. و حق .. و حريه

احنا جيل .. مش عايز يظلم الجيل اللى بعده .. برده بسكوته
احنا جيل .. عايز يشوف جيلك جنب منه و بيساعده
بمعنى اصح
يقويه .. مش يقوى عليه

بقلم
محمود مجدى

12/6/2012

Page
www.facebook.com/MahmoudMagdyOfficial


....